तोतङ्गरी ल्होसार धुमधाम मनाईंदै (फोटो, भिडियो फिचर सहित)

रेशमराज रोकाया
हुम्ला, पौष, ११

लामा समुदायको ल्होसार अर्थात नयाँ वर्ष धुमधामको साथ मनाएर सम्पन्न भएको छ । हुम्ला जिल्लाको सिमकोट गाउँपालिकाको उत्तरी भाग र नाम्खा गाउँपालिकाभर बसोबास गर्ने सम्पूर्ण लामा समुदायले यो वर्षको नयाँ वर्ष (ल्होसार) धुमधाम मनाएका छन् । नयाँ नयाँ वर्षको अवसरमा सम्पूर्ण बौद्ध धर्मावलम्वीको एकता स्वरुप मनाईने यो पर्वमा हरेक घरको अगाडी खडा गरिने लिङ्गो फेर्न, घरमा पुजाआजा गर्ने, मिठो मसिनो खाने र पाहुनालाई बोलाएर स्वागत गर्ने प्रचलन रहेको हुन्छ ।

हरेक घर परिवारले उनीको कपडाबाट बनेको पौराणिक कपडा पहिरनमा सजिने चलन रहेको छ । गएको वर्ष भन्दा यो वर्ष धन, दौलत, सुख शान्तीपूर्ण रहोस् भन्ने मनोकाँक्षा पनि यो पर्वमा गर्ने गरिन्छ । पर्वको अवसरमा घर भन्दा टाढा रहेका आफन्तको समेत भेटघाट गर्ने अवसर यो पर्वले दिने गरेको छ ।

नयाँ वर्षको अवसरमा आफन्तजनलाई ढोग गर्ने र आशिर्वाद समेत लिने चलन रहेको छ । ल्होसारमा सदरमुकाम सिमकोटमा बसोबास गर्ने हरेक गाउँ र समुदायले विभिन्न ठाउँमा सामुहिक रुपमा पनि ल्होसार मनाउने गरिएको छ । आज नै सिमकोटमा रहेको लामा साँस्कृतिक मञ्चमा जिल्लाका हरेक लामा समुदायका वासिन्दाले एकजुट भई नयाँ लिङ्गो समेत ठड्याई एकआपसमा शुभकामना दिने प्रचलन रहेको छ ।

हरेक नयाँ वर्ष विभिन्न पशुपंक्षीको नामले चिनिने समेत गरिएको छ । ल्होसारको यो वर्ष २१५० रहेको र यो वर्षलाई ह्योल्हो अर्थात खाजा वर्षको रुपमा स्वागत गरिएको छ । ल्होसारका १२ वट वर्ष मुसा, हात्ती, बाघ, खरायो, मेघ, सर्प, घोडा, बाँदर, चरा, कुकुर, सुँगुर र भेडा गरी १२ वर्गमा तोतङरी ल्होसारलाई विभाजन गरिएको छ । ल्होसारका १२ वटै वर्ष पशुपंक्षीको नामबाट गणना गरिएकाले लामा र ब्यासी समुदाय प्रकृति पूजक रहेको पनि बताइन्छ । बौद्ध धर्मावलम्वीले ल्होसार विभिन्न समयमा मनाउने गरिएको भएता पनि हुम्लामा तिव्वतियन क्यालेण्डर अनुसार यसलाई मनाउने गरिएको छ । यसलाई तोतङ्गरी ल्होसारको रुपमा हुम्लामा मात्र मनाउने गरिएको छ ।

भिडियो हेर्नको लागि यहाँ रहेको युट्युब लिंकमा क्लिक गर्नुहोला ।